نفسي اعيط

خمس سنين من القرف وحرقة الدم...ولسة بحن !!

هنا

في المكان دة

قضيت خمس سنين بعتبرهم اكتر خمس سنين في حياتي نكد وقرف وعذاب

مابين محاضرات وسكاشن ومعامل وخناقات مع بعض والنفسنة بين العيال الي هناك

اه عيال... واطفال كمان

مجتمع كليتي للاسف كان اكتر مجتمع كرهته

ذكوري لاقصى درجة

الولاد بيعاملونا على اننا جواري.. واي بنت هناك مهما كانت محترمة لازم حيتكلموا عليها

ولو مالقوش اي غلطة فيها كانوا بيتريقوا برضة

ياما سمعت بودني كلام كان حيخليني في يوم ابيد المكان دة بقنبلة او اقتل الي فيه بالسكينة

الولاد كانوا بيكرهوا البنات عشان الدكاترة بيراعونا في الدرجات اكتر منهم

واحنا كنا بنكره الولاد عشان بيتعينوا معيدين واحنا لا

افتكر اني عمري مامشيت في الكلية دي الا واتعاكست ومن دفعتي كمان

وصل معايا القرف والكره للمكان دة لدرجة اني اسيبها واللي يحصل يحصل

وكنت في البكالوريوس كمان

وافتكر كمان اني مهما عملت وذاكرت عمري ما حاخد اكتر من 5 من 10 اللي حيتكرم المعيد يديهالي بحجة انه وهوة طالب مكنش بياخد اكتر من كدة

بس وسط دة برضة بحن لها

اي والله بحنلها

بحن لاول يوم دخلتها فيه

يوم مابصيت على المبنى الجديد الي عملوه لاعدادي

دخلت قلت ربنا يستر واحب المكان دة

وسبحان الله مقدرتش احبه الا لما سبته

بحس بحنين على خفيف يعني

وبتخيل نفسي بتمشى جنب الكافيتيريا الفاشلة بتاعتهم الي الكانز فيها بتلاتة جنيه وعليها تراب وطين

وبتخيل نفسي وانا بجري عشان الحق سكشني الي في اخر الدنيا

واخده وانطلق للمبنى الي فوق دة عشان المحاضرة الي بعد دة

في المبنى دة ناقشت مشروع تخرجي

حسيت اني شفت المبنى دة كأني اول مرة اشوفه فيها

كنت مبسوطة وفرحانة

وزعلانة

مبسوطة عشان حناقش مشروعي وخلاص مش جاية الكلية دي تاني

وزعلانة عشان مش حيبقى فيه محاضرات وسكاشن تاني

وامتحانات :(

والايام الصعبة الي بستنى فيها نتيجتي

لما كنت بصرخ من الفرحة لما اجيب تقدير عالي

ولما كنت بصرخ من الحزن عشان شلت مادة او اتنين

اه بتحصل يعني.. اول سنة جبت جيد جدا واخر سنة جيد جدا وفي النص مقبول بالعافية :D

دة بقى معمل الـ GPS

كنت بحب المعمل دة والراجل الي واقف دة المهندس الي كان بيورينا ازاي الجي بي اس ريسيفر بيشتغل :D

حقيقي رغم كرهي للمكان دة لكن لازلت مرتبطة بيه وبكل ذكريات عدت عليا خلال الخمس سنين الي فاتوا فيها

ونفسي ارجع تلميذة تاني

ضمير البشر ... في الباي باي

ضمير.... كلمة اتلغت تماما من قاموس حياة اغلبية البشر

الضمير الي بيحرك الناس للخير او للشر

شئ لو حي... يقدر يغير من الدنيا ويسعد اصحابه والبشر

ولو مات... يبقى على الدنيا السلام

ملاحظة ان كلما تقدم بنا الزمن... كلما زات موت الضمير عند البشر جميعا

مش متخيلة كمان كام سنة ممكن الدنيا تنتهي

صور انعدام الضمير موجودة في كل مكان وممكن نلمسها دلوقتي بمنتهى السهولة

ضمير الاطباء والمهندسين والتجار وصناع قرار هذا البلد

واخر فئة دي اخطر فئة ممكن انعدام الضمير فيها يؤدي الى كارثة

ودة الي حاصل فعلا دلوقتي

انعدام الضمير عند الاطباء..

اللي منهم يرتشي عشان منصب ودة عامة وخاصة

والي منهم يخالف شرف مهنته ويقوم بعمليات غير شرعية نظير حفنة من المال

واللي منهم يموت مريض بسبب عملية او دواء غلط ويقول انا مالي

كنت عند الدكتور امبارح ...

والحمد لله انه من الاطباء اللي ضميرهم لسة جواهم

ماما كانت تعبانة قوي وآلام المعدة

ماقدرتش تستحمل المها

مقدرتش انا استحمل صراخها

اتحايلت عليها اوديها للدكتور وتقول شوية وحخف

لما الام زاد عليها قلت لازم تروح بالقوة الجبرية

رحنا للدكتور وشخص حالتها

بإن عندها التهاب حاد في المعدة

وكتب لها على ادوية

واشتريتها وابتدت في انها تاخد الجرعات في مواعيدها

تاخد ادوية .. والالم بعينه موجود

بكلم الدكتور ان الالام لسة موجودة

قاللي ان للاسف معظم ادوية مصر .. ان مكنش كلها ... غير فعالة بالمرة

على الرغم من انها غالية جدا

قاللي ان كل ادوية السوق المادة الفعالة فيها ضعيفة جدا جدا

بدرجة ممكن المريض مايخفش معاها بسهولة

وان دة للاسف موجود عشان يزيد من شراء الادوية عشان الناس تشتري عشان تخف

يعني الاجوية بتغلى كل فترة والمادة الفعالة بتقل؟؟؟

صلاة النبي احسن

هوة دة الكلام....شوفوا ضميرهم صاحي ازاي؟؟

المفروض الناس تحمد ربنا ان فيه ادوية اصلا

ضمير التجار

وخصوصا تجار اللحمة الحميري والفراخ النافقة والمريضة

اكتشفت اني بقالي 6 سنين باكل لحمة حمير

ست سنين باكل حمير على هيئة سندوتشات سجق والسندوتش بجنيه

وكل مرة اللحمة تعجبني واقول الله دي حلوة ورخيصة :D

هي دي الرمرمة على اصلها

وهو دة الغش على اصله

تيجي بقى للفئة الخطيرة الموجودة

صناع قرارات مصيرية في بلدنا

او بمعنى اصح كبارات البلد ومسئوليها

اللي مجوعين شعبهم عشان ياكلوا هما ويرتاحوا

اللي الطبقة الوسطى في شعبهم ابتدت تنزل لتحت ولتحت قوي بسبب الغلاء المستمر

وهما يبيعوا الغاز لاسرائيل مدعم

اي والله مدعم

اسرائيل

الي كنا زمان... زمان قوي

مستعدين نضحي بنفسنا عشان ماتاخدش البعيدة حبة رملة من بلدنا

ضيعنا حياتنا زمان عشان ماتسرقش مننا حبة رملة... واحنا نفسنا دلوقتي.. بنديلها غازنا ومدعم

وهدية كمان بمناسبة مرور 60 سنة على قيام دولة اسرائيل

ياحلاوة ياولاد........ دة كدة اعتراف صريح بانها دولة

واعتراف برضة ان شهدائنا مالهمش لازمة

وغلطانين انهم يضيعوا حياتهم عشان اسرائيل ماتغتصبش ارضنا

ياراجل احمد ربنا اننا بنترحم عليهم اصلا وبفتكرهم في المناسبات ونكرمهم

كدة كفاية قوي

دول غلطانين اصلا.. كانوا سايسوا امورهم بدل مايموتوا ودمهم يسيح في الارض

شهدا اية ياراجل بلا كلام فارغ!!!!

ياعالم اية الي حيحصل بعد كدة مش بعيد ندي سيناء هدية لاسرائيل

ابقوا والنبي سلمولي على الوطنية قبل ماتمشوا من التوبك

كفاية كدة قلبي وجعني

ســـــيـــــارة احـــلامـــي ..!!

عشان تحملوا Wallpapers ادخلوا على اللينك دة:

http://www.mini-egypt.com/com/en/download_gallery/index.jsp?refType=teaserStandard&refPage=/com/en/general/homepage/content.jsp

يــا قلــبــي

ياقلبي

اعدك ان لن تبقى محاصرا

ان لن تضطرب دقاتك لحب

سأبقى بعيدة لن تستمع اذناي لهمساته

لن أصف صوته بالعذب

عذرا ياقلبي .. لا تشعر يداي بالدفء بعد ان فارقت يده

لا تشعر روحي بالامان بعد أن فارقت حضنه..

أتعلم ؟؟ لا اشعر بوجودي معك بعد ان فارقته؟؟!!

اتظن اني استسلم وافتقد اشواقه؟؟!!

أتظن اني اعدك وأنتظر احضانه؟؟!!

كفى ياقلبي بي ظنا فأنا لست حمقى

كم من مرة ادعى قلبه انه يحمل هوى فارس

كم من مرة ارحت رأسي في احضان ذلك الكذاب؟؟!!

أفتقد الامان بحياتي

أيا قلبي تسمعني ؟؟!

أتشعر بانهياراتي؟؟

أستجد لي دربا يخرجني من متاهاتي؟؟

أتمنى لو أرى الامل ينبعث من ذكرياتي

كنت عشق القلب ومالكه فقتلت قلبي وصرت للحزن مالكه

نبض قلبي ينادي باسمك .. استبدلته بعقارب ساعة بكماء صامتة

السماء تذكرني بعينيك

اجمل البسمات كانت بسمتك ... فصرت انا للعبوس عاشقة

يـــــــــــا عــمــري أنــتــظـــر خــطــابـــــــــك !!!!!!

ناس بلاستيك .. بكلمة ايلاستيك

Elasticity & Plasticity

اول مصطلحين ادرسهم في كلية الهندسة

مادة Plastic يعني مادة تتحول من شكل لشكل مع احتفاظها بالشكل الجديد

مادة Elastic .. يعني مادة مرنة .. تتحول اة.. بس ترجع زي ماكانت الاول

كانت دكتورة منال استاذة الفيزياء في اعدادي بتربط بين الفيزياء وحياتنا بصورة غريبة

كنت بستغرب فعلا

لغاية ما اقتنعت ان كلامها صح وان الفيزياء تغلغلت في حياتنا لغاية ماوصلت لحياتنا الشخصية ومعاملاتنا الانسانية

اقتنعت عشان اكتشفت ان فيه ناس ليهم نفس الخواص الفيزيائية الي قلتها فوق

ناس بلاستيك .. قابلين للتحول .. ويثبتكوا على الشكل الجديد .. مايتغيروش .. ولا يرجعوا لاصلهم

وكلامهم ايلاستيك مرن.. مطاط .. بيتحول برضة .. ويدي اكتر من معنى .. وممكن المعنايين يبقوا متناقضين بصورة بشعة

وفيه ناس Solid .. ثابتين طول الوقت.. يا بالحلو يا بالوحش..غير قابلين للتحول

مع ان اول فئة دي لازم تطلب معاهم تحول فعلا عشان الناس كلها بقت زي اللي فوق .. عشان الكيميا تشتغل بقى :> وعرفوا يتعاملوا

انا من الناس ال Solid .. الفئة الاولى

وأفتخر

كلام مالوش معنى اه.. بس جة في بالي قلت اكتبه

وزي مايكون بقى

بحب اشرب البشاميل في كوباية

اه .. اية المشكلة يعني :D

عادة وخدت عليها من زمان قوي


يمكن عشان بشاميل ماما لا يعلى عليه..


يمكن تغيير من شكل المكرونة بالبشاميل


ياسلام لما تجيب البشاميل في كوباية.. او زبدية ماتفرقش

وتجيب المكروناية المسلوقة.. وتغطسها في قلب البشاميل

وترفعه وتسيبه ينقط لغاية مايوصل للمغارة المفتوحة جبريا الي اسمها بقك

متعتي بجد مش عارفة دة جنون ولا اية :D

ولا عشان كنت بعمل كدة زمان وانا صغيرة؟

يمكن دة حنين لادق واتفه الحاجات الي كنت بعملها زمان؟

ولا تمرد من الحاضر..وشكل المكرونة الي واخدينه ولا اية :D

ليلتنا فنننننننننننننننننننننننننننننن يامعنمي

التهييس بدأ :D

الحق بقى امارس متعتي اللي اصبحت عادة لليوم العالمي للمكرونة بالبشاميل

اصلها مرة كل فين وفين

قبل ما اي حد يفهمني غلط :D

المغزى من الموضوع دة مش البشاميل ولا الكوباية

المقصود هوة قد اية حلو انك تحافظ على الحاجات الي كنت بتعملها زمان

وتعيد فعلها وتواظب عليها كمان

بغض النظر عن الحاجات المريبة الي كانت بتتعمل زمان

فيه حاجة غلط

لما تلاقي نفسك تايه.. ومش عارف مكانك فين.. تحاول تحدد موقعك من الدنيا ومن الي حواليك.. تفشل .. تفشل من حتى انك تشوف طريقك.. اليأس ماليك.. تحس انك اعمى.. مع ان كل شئ واضح قدامك ..

يبقى فيه حاجة غلط

لما تلاقي صوتك منبوح.. مكتوم.. عاوز تصرخ بكل قوتك.. تقول اااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه بس مش قادر .. تحس انك بتزق في حيطة .. بكل قوتك ومش قادر

يبقى فيه حاجة غلط

لما صحابك .. الي هما اقرب ناس ليك.. اللي اسرارك في ايديهم.. وتحس انهم روحك وحياتك .. الي ممكن توقف الدنيا علشانهم
ومن اول موقف.. طلعوا بلاستيك.. شكل على الفاضي.. وكل واحد منهم عرفت انه بيدور على مصلحته.. او عرفك مصلحة .. لما مصلحته قضيت سابك تخبط دماغك في الحيط.. يقوللك انا صحبك انا جنبك.. ووقت التنفيذ ماليش دعوة ومع نفسك ماليش دعوة
لما ييجوا عليك قوي ويستهفوك بحجة انك غلبان وطيب ومش حتشتكي

يبقى فيه حاجة غلط

لما حبيبك.. اللي يلهيك بقى عن صحابك الي فوق.. الي تترمي بين احضانه تشكيله.. ماتتكسفش منه لما تنزل دموعك جوة حضنه ..
لما يبقى حبيبك كدة.. وفجأة يكون هو سبب عذابك وألمك.. يجرحك ويدوس عليك بكل قوته وهو مش حاسس.. ويقوللك اوعى تفهمني غلط

يبقى فيه حاجة غلط

لما يخونك .. لما يغشك.. وبمنتهى البجاحة يقوللك انت الي غلطان ومش قادر تفهم .. لما يطعنك بسكينة.. ويدوس على جرحك يستنزف دمك.. ويفتح جروحك القديمة كلها ويسيبك تنزف.. تكرهه وتكره الايام الي جمعتك بيه.. ويرجعلك يقوللك آسف سامحني ربنا يسامح وانت لا

يبقى فيه حاجة غلط

لما تمشي في الشارع .. تلاقي الناس اتغيرت.. الطيبة اتحولت جواهم لشر وبلطجة.. يمشوا بالدراع..ووشهم مكشر مرعب
لما النخوة والرجولة والجدعنة والشهامة يختفوا فجأة لما بنت تتعاكس او تتسرق او تنضرب في وسط الشارع

يبقى فيه حاجة غلط

لما الشرير البلطجي .. الي واخد الدنيا بدراعه.. يعرف يعيش ملك.. والطيب الغلبان ينداس عليه ويموت

يبقى فيه حاجة غلط


لما الدنيا تتحول فجأة لكمية متناقضات وغلطات.. الصح كلمة مش موجودة في قاموسها

يبقى الحل اية؟؟!!

قولولي....

لو فيه حاجة غلط!