الأربعاء، 4 مارس، 2009

بـدري الـوداع ...




زي كل افلام السينما الابيض والاسود


اتنين اتقابلوا .. حبوا بعض بس زي الافلام ..


هو فقير وهي غنية لسة في بداية حياتهم في الجامعة


اتواعدوا انهم مايبقوش غير لبعض عارفين الحب الطاهر النقي دة ؟؟؟؟ الي بقالنا كتير قوي ماشفناهوش ... وفاكرين انه اختفى ؟؟ او قدم مع قدم الافلام القديمة الي بنشوفها فيها؟؟


عمري ماتخيلت ان فيه حب بالشكل دة .. قد اية يعرفوا بعض من سنين طويلة .. وقد اية رابطة الحب بينهم اقوى من اي مصالح .. اقوى من فقره وغناها


اقوى من مصالح باباها الي غصب عليها خطوبتها من ابن شريكه .. اقوى من كنوز الدنيا


هي غنية وعايشة برة .. وباباها صاحب شركات وملايين .. وساكنة في فيلا في مصر وبرة مصر


هو فقير ساكن في حي شعبي .. مايملكش غير شقة صغيرة في بيت العيلة


بس جواه طموحات واحلام توصله لسابع سما .. غير حلمه الازلي بالارتباط بيها


اتخرجوا .. اشتغل واحدة واحدة .. جمع مية في مية بقوا الف بقوا الفين



همه انه يجيب فلوس كتير عشان الشبكة والمهر وكل حاجة عشان يبقى جدير بيها


ابتدا السلم من اوله اشتغل وهو في الكلية كمان .. اي شغل يجيله يرشق فيه مش مشكلة بالنسباله


فضل يشتغل ويعمل اي حاجة تجيب فلوس عشان خاطرها


اتخرج .. ودور لغاية مالقى شغل في شركة محترمة وفي تخصصه كمهندس


هي كلمت باباها .. رفض زي كل الافلام العربي القديمة


هو اية معاه اية ابن مين يملك اية؟؟؟؟


مامعهوش حاجة ومش ابن حد يملك زيه فالنتيجة كانت الرفض وغصبها انها تتخطب لابن شريكه


الخبر نزل كالصاعقة على طريقة روايات ملف المستقبل ورجل المستحيل


تتخطب لغيري ؟؟؟ تكون لغيري ؟؟ ازاي


بكاء .. الم ... غصب عنها مستحيل تكون لحد غير ليه


كل يوم تكلمه


يوم الخطوبة اتصلت بيه ومخنوقة مش عاوزة


صممت ورفضت .. اخوها هددها لو ما اتخطبتش للي عاوزينه حيلبسوا حبيبها تهمة ويرموه السجن ... اخوها وكيل نيابة


خافت على حبيبها .. رضخت واتخطبت وصممت بعد كدة انها تختلق اي سبب عشان تفسخ الخطوبة


كلمت حبيبها ... قالتله انا مش قادرة .. انا بحبك انا مش عاوزة غيرك انت


في الوقت دة كان هو بيعمل كل جهده عشان يكون جدير بيها


اشتغل بمرتب كويس قوي


قرب خلاص يحقق كل احلامه نجمة حلم يمسكها .. قرب منها لغاية ماقرب خلاص


هوب


القدر يلعب لعبته ويفرق الحبيبين


غابت يوم يومين اسبوع


هو عالنت قلقان عليها مادخلتش زي عوايدها


يدخل يكلمها ا.. يسيب لها اوفلاين مسج


انتي فين كل دة شغلتيني عليكي اسبوع بحاله عاوز اتكلم معاكي عشان اعرف حترجعي مصر امتى .. عشان اقابل باباكي .. يارب يوافق ..


مش متخيل حياتي من غيرك ..


افتحي بقى انتي وحشاني قوي


النهاردة


قعد مستني عالنت دخلت صحبتها


كلمها قاللها هي فين


سكتت


قاللها اية


قالتله .. ماتت


حادثة عربية .. اتوفت في الحال


واهلها جابوها مصر امبارح عشان تندفن .. واندفنت خلاص من يومين


الدنيا كلها لفت بيه


حاجة خبطت على دماغه .. جردل مية تلج واندلق عليه


مش مصدق


انتي بتتكلمي جد


قوليلي انها عايشة


قوليلي انها ماماتتش ... اكيد ماماتتش .. قوليلي اني انا بحلم


لكن للاسف .. كابوس وعمره ماحينتهي


قصة الحب دي الي فاقت كل اللي شفناه في الافلام قصة الحب


الي كنت متابعاها من بعيييييد


اتكتبتلها نهاية النهاردة


بس اقسى نهاية ممكن اي بني ادم يتخيلها


اخر حاجة الواحد يقدر يوصللها بعد كل دة ..


الحبيبة تموت والحبيب بيلاقي نفسه تايه .. مش عارف يعمل اية


مجرد جسد على كرسي كمبيوتر عنيه متعلقة على اسمها في المسنجر على امل انها تفتح


نـور ... على قد ما اتمنيت ان قصة حبك تنتهي بالنهاية الي كنا كلنا متوقعينها .. على قد مانراقك صعب .. مش قادرين نتحمله


.. ربنا يرحمك يارب ويغفرلك ويثبتك


خـالـد ... مش عارفة اقوللك اية .. ربنا يصبرك على فراقها .. وعلى الايام الي حتعدي وهي مش في حياتك واللي حتبقى مجرد ذكرى لست سنين عشت فيها وكنت حاسس انك في الجنة


ياريت ياجماعة كل الي يدخل يدعي بالرحمة لنور ويقرالها الفاتحة


الله يرحمك يانور .. ويغفرلك ويثبتك ويجعل مثواكي الجنة



هناك 8 تعليقات:

نعكشة يقول...

لا حول ولا قوة إلا بالله

ربنا يرحمها و يدخلها فسيح جناته
و يقبتها

و يصبر أهلها و يصبر خالد

و يرحمنا لما نوصل لما صارت إليه

أعتقد إن مش هيا دية النهاية

لأ
ان شاء الله هتدخل الجنه
و هوه يحاول يجتهد كمان زي ما كان بيجتهد عشان يدخل الجنة
و هناك ممكن تبدأ القصة

البنت اللي بتموت من غير ما تتزوج في الدنيا
بتدخل الجنة و ربنا بيزوجها واحد من اهل الارض

ربنا يدخلنا الفردوس الاعلى

آمين

سلام عليكِ

Reem يقول...

ربنا يرحمها و يغفرلها و يعين حبيبها و يصبره على فقدانها

ربنا بجد يعينه و يسكنها رحمته

samamasr يقول...

ربنا يرحمها ويحسن اليها,كلنا لما نقرأ نقرأ لها الفاتحة ونترحم عليها بإذن الله ,ربنا يرحمها ان شاء الله

leeno يقول...

انا كنت فاكراها قصة !! لحد الاخر و بقالي 10 دقايق فاتحة على الرد و مش عارفة ارد

صديق لاخويا كدة سبع سنين والدها كان رافضه و لما وافق البنت ماتت!!

ربنا يرحمها و يسكنها فسيح جناته و يغفرلها و يعفي عنها !!!!

moodysalihamidzic يقول...

الله يرحمها ويرزقها الجنة

shabfa2re يقول...

ربنا يرحمها ويصبر الجميع يارب

~ Heba ~ يقول...

مبدأيا انا اسفة في تأخيري للرد

نعكشة : هي فعلا محتاجة الدعوات دي .. ردك طمني قوي وفرحني .. ربنا يرحمها ويصبره يارب .. شكرا على ردك

ريم : آمين يارب .. شكرا لمرورك

ايمان سما مصر : ياريت نقرالها الفاتحة .. هو دة الي نقدر عليه في الوقت الحالي .. شكرا على ردك يا ايمان

لين : القصص للاسف مش واقعية قد الي موجود في الحقيقة .. الواقع اقسى بكتير .. وبيحصل كتير قوي .. ربنا يرحمها ويرحم خطيبة صاحب اخوكي ويرحم موتانا جميعا .. شكرا على مرورك يالينو :)

مودي : آمين يارب .. شكرا لردك

شاب فقري : آمين يارب ويصبر الجميع .. شكرا ليك .

Miss.Allu يقول...

يا الله...
مش مصدقة انها قصة حقيقية
الله يرحمها يارب
ويصبره..

زعلتيني بجد..

الله يكون في عونه..