الأحد، 11 يناير 2009

الـريـس .. خـالـد صـالـح










مش عارفة لية انا بكتب البوست دة دلوقتي .. يعني كان فيه وقت وسبب عشان اكتبه



بس ان تعبيري لحبي لفنان رائع زيه مش محتاج لمناسبة ابدا



كلامي النهاردة .. عن سلطان الغرام ..



الريس .. زي ماكلنا بنحب نقولله



اقوى ممثل ظهر من فترة طويلة قوي .. كنا مستنيين موهبة عبقرية زيه..



ومسلسل زي بعد الفراق يرجعلنا الرومانسية اللي كنا خلاص قربنا نفقدها



او فقدناها خلاص .. معظمنا ان مكنش كلنا



وفيلم زي هي فوضى



نحبه ونكرهه ونتعاطف معاه ويصعب علينا ونضحك من ردود افعاله



ماحصلتش معايا زي ماحصلتلي مع حاتم



خلطة عجيبة من المشاعر المتناقضة سيطرت عليا وانا بشوفه في هي فوضى



ركزت معاه في كل هفوة وهمسة وحركة عينيه حتى ..



حتى جملته الاشهر ( اللي مالوش خير في حاتم .. مالوش خير في مصر )



راقبوا بجد كل همسة بيهمسها .. راقبوه وهو بيوصل تأثير الكلمة الي بيتكلمها جوة الشخصية باستخدامه لادواته اللي بقى ريس واستاذ فيها حقيقي .. تعبيرات وشه حركة عنيه حتى نبرة صوته



منتهى الابداع والعبقرية



حسيت اني عاوزة اتعلم منه حاجات كتير قوي .. في كل حاجة حتى اداءه التمثيلي بالرغم اني مش ممثلة



التزامه عشقه لكل شخصية بيقدمها احترامه لفنه ولجمهوره



للاسف نجوميته دي اتأخرت قوي



يعني لما ابتدى يظهر في التليفزيون



مكنش حد بيحس بيه من صغر ادواره اللي يادوب مشاهده فيها مابتعديش صوابع اليد الواحدة



بس كان يوم مايمثل مشهد .. بتحس انه مشهد قوي قوي .. يمكن تلاقي العمل اللي بيمثل فيه عادي مفيهوش جديد



بس اداءه بيضيف قوي



زي حين مسيرة



لما ظهر في مشهد واحد



والمشهد في الفيلم كان حلم بتحلمه ام رضا اللي قامت بدورها الفنانة هالة فاخر



والمفروض رضا الي هو خالد صالح كان راجع من العراق محمل بالفلوس والهدايا



وماننساش المروحة الكهربا والكاسيت ابو روحين



وفي عنيه فرحة رجوعه للحارة .. بعد طول غياب



مشهد واحد .. بس بأداءه فرق كتير قوي





بعد الفراق



مع الجميلة المتمكنة قوي هند صبري


كل مشهد ليه في المسلسل سواء مع هند او مع اميرة العايدي او نشوى مصطفى


قدر ينقل لك كل ذرة احساس جوة الشخصية


مشهده مع هند صبري لما جالها بيقوللها نرجع لبعض وهي قالتله انا اتخطبت


مشهده مع اميرة العايدي وهما في الكازينو وبيعترفلها انه لسة بيحب سكرة .. رغم ان دنيا ( اميرة العايدي ) مراته
واعترافه دة تحت تأثير البيرة


مشهده الاقوى مع نشوى مصطفى .. لما اداها عقد شقته وتنازله عن املاكه لاخته بسبب احساسه بقرب نهايته


اكتر مشهد بكاني قوي .. حسيت اني قلبي وجعني قوي قوي قوي


للاسف ماشفتش مسلسل سلطان الغرام


ولا عارفة اتابعه


بس متأكدة ان المسلسل دة متميز .. عشان سلطان .. مش عشان حد تاني



خالد صالح



تستحق اننا نرفعلك القبعة


تستحق ان معجبينك يزيدوا مع كل شوت بيتمثله


تستحق النجومية اللي قدرت تصنعها بمجهود سنين وبعبقرية وبكاريزما مش موجودة دلوقتي


تستحق مكانتك دي مع انها جت متأخرة .. وتكريمك مؤخرا كأفضل نجم سنة 2008 يعتبر اقل القليل الي نقدمهولك


تستحق اننا نحبك ونموت فيك ونستنى اعمالك وندور على اخبارك ونتلهف عليها


تستحق كل حاجة جميلة في الدنيا


لانك .. الريس .. خالد صالح





تحديث لابد منه



اخيرا لقيت سبب اقدر اتمحك فيه عشان البوست دة :D


الريس خالد صالح .. عيد ميلاده كمان 8 ايام



20-1



كل سنة وانت طيب ياريس ويارب تكون ايامك كلها فرحة ونجاح ونجومية اكتر واكتر


ويارب تحقق كل احلامك في السنة الجديدة وتبقى النجم الاوحد في مصر كلها


كل سنة وانت بتمتعنا بفنك وبأداءك القوي في كل عمل بتقدمه


كل سنة وانت بخير وسعيد


كل سنة وانت عبقري
يارب تشوف البوست دة عشان تعرف قد اية انا من اشد المعجبين بيك ..
واني نفسي اقابلك واهنيك على نجاحاتك واقوللك كل سنة وانت طيب
وبالمرة كمان اقوللك اني قدرت اتوصل لسر اختفاء يوسف الصياد في المسلسل :D
ودة بعد مشاهدة الحلقة الاخيرة حوالي خمس مرات :D


هناك 7 تعليقات:

The Seagull يقول...

يا سلام بقى لو شوفتيه في "الريس عمر حرب" :D أنصحك تشوفيه بجد .. هتبهري انبهـار مريع :D من تمكنه من الشخصية اللي بيمثلها وطريقة كلامه وحركاته وإقناعه الرهيييييب :D .. بوست رائع يا هوبة أنـا كمـان من محبين الممثل القدير ده بجد :)

~ Heba ~ يقول...

سي جل

متشكرة قوي على ردك .. انا لما جيت قريت البوست دة تاني حسيت اني اتسرعت لما بعتته .. حسيت انه ناقص قوي قوي .. لقيت عندي كلام اكتر من كدة كان لازم ينزل مع بقية الكلام

الريس عمر حرب انا بدور عليه فعلا دي في دي عشان اكمل مجموعة افلامه الي بحاول اجمعها .. انا نفسي اقابل خالد صالح قوي .. نفسي اشوفه عشان اقولله اني من اشد المعجبين بيه وبكل مشهد بيعمله .. وعشان اقولله اني قدرت اتوصل لسر اختفاء يوسف الصياد بعد مشاهدتي للحلقة الاخيرة خمس مرات :D

ReEm يقول...

بصراحة بوست هايل يا هوبا في حق الممثل ده

بجد من احسن الناس اللي بتحس بانك بتتفرج على شخص من الواقع مش تمثيل

احساس عالي و اندماج مع الشخصية بشكل رهيب

غير معرف يقول...

مهو انتي علشان جميلة وطيبة وبنت حلال

مش عارفة لو فيه علاقة بالرد ولا لا :)

leeno يقول...

وحشتيني جداااااااااااا

من زمااااااااااااان لا كلمتك و لا سمعت عن اخبارك خالص و انا اساسا منقطعة عن ايجي من مدة مش قصيرة


اخبارك ايه؟؟ دة اولا


ثانيا بقى


انا معاكي خالد صالح مش بس ممثل موهوب لا هو غول تمثيل كاريزما و اتقان للدور مالوش وصف و لا حل
اول مرة اشوف حد ياكل كاريزما احمد السقا على الشاشة في فيلم حرب ايطاليا خالد صالح بهرني كممثل و كا كريزما و بعدها توالت الانبهارات


و بعدين انتي تتمحكي ليه عشان تعكلي بوست انتي تكتبي اللي تعوزيه :)


وحشتيني

~ Heba ~ يقول...

ايمان سما مصر

انتي تكتبي الي انتي عاوزاه .. ليه علاقة مالوش مالكيش دعوة
انتي عارفة ان اي كلمة بتكتبيها في اي حتة بحب اقراها .. يعني من الاخر اكتبي ولا يهمك اي حاجة :)))

ليونتشي
انتي وحشاني قوي قوي قوي .. اخر مرة قابلت نورهان سراج قعدت تتكلم عنك لدرجة انها شوقتني اني اشوفك .. في اقرب وقت باذن الله تكوني فيه في مصر ان شاء الله اشوفك على خير :)
بالنوسبة للبوست فالريس غلب الممثلين الشباب وحتى الكبار الي كانوا عشق الجمهور .. وفي وقت قليل كمان
انا تقريبا شفته بس مش متأكدة .. واحد شبهه قوي قوي وكان لابس نظارة امبارح كنت حخبطله عربيته في دريم لاند :D
ميرسي على تعليقاتكوا جدا :D

dr_samarmar يقول...

هبة

عمرك أطول من عمرى و حياة ربنا :D


خالد صالح بجد أستاذ و متميز بالنسبة للى حواليه

و ف سلطان الغرام جميييل جدا

و بحب أوى أوى دوره فى فيلم أحلام حقيقية

كل سنة و هو طيب

سمر :)