زمان لما كنت صغيرة ولغاية ثانوية عامة
دنيتي اللي صنعتها في الوقت دة كانت صغيرة
وكل حاجة فيها كانت باختياري انا
خرجت بعد ثانوي على الكلية
على عالم مفتوح وواسع
عوالم عجيبة وغريبة
ماتعودتش على وجودي فيها ابدا
عوالم موحشة مظلمة
اتفرضت عليا غصب عني
الدنيا وسعت مني قوي
نفسي ارجع لدنيتي الصغيرة
دنيتي اللي كان كل شئ فيها باختياري
وكل حاجة عملتها فيها كانت بارادتي
تعبت قوي في الدنيا دي
مالقتش فيها غير آلام وعذاب
كل آلام الدنيا حسيتها في خلال 6 سنين
ومش عارفة اواجه حتى كل تفصيلة متعبة في العالم دة
ولا عارفة احتى ارجع لعالمي الصغير
بحس كتير اني نفسي اقعد في كورنر لوحدي
انزوي فيه وادفن راسي جوايا
واغمض عنيا
نفسي اصحى دلوقتي
في بيتنا القديم
شهر 4 سنة 2000
وانا رايحة امتحان اللغة العربية اولى ثانوي
اصحى من النوم اقول ياااااااااااااااااااااااااااه .. كان كابوس فظيع
واحمد ربنا على النعمة اللي انا فيها
واسترجع كل تفصيلة شفتها في الكابوس
واستفيد منها لايامي الجاية
ونفسي دلوقتي وانا قاعدة على السرير
اغوص بسريري لاعمق اعماق الارض
واختفي تماما من الوجود
الهروب مش حل
بس مريييييييييييييييييييييييييييييييييح قوي ..!!
هناك 3 تعليقات:
السلام عليكم و رحمة الله و بركاته
بجد كلامك جميل و طالع من القلب فعلا بس مش عارفة ليه حاسة انك خوفتيني يمكن لأني لسة سايبة التانوية العامة من سنة بس و عمري معتبرتها أيام حلوة و لقيتك دلوقتي بتقولي عليها حلوة فخوفتيني أوي من أيامي الجاية بس الي حقولهولي و أقولهولك دلوقتي "ألا بذكر الله تطمئن القلوب"أنا مستنياك عندي في المدونة ياريت تبقي تشرفيني
ياااااااه يا هبة كلامك مؤثر اوى اوى
و صعب
و أنا بالظبط زى سلمى كدا لسة خارجة من ث ع بقالى سنة و قضيت سنة واحدة بس فى الكلية
بس تعرفى .. فى السنة دى انا كمان حسيت ان الدنيا وسعت منى ... علاقاتى كترت بطريقة غريبة لدرجة بقت بتخوفنى
أمال بعد ال 4 سنين الجايين هعمل ايه ..
عموما بكرة ترتاحى ان شاء الله
بكرة تتمنى انك تفضلى ف نفس لحظاتك و ماتسيبيهاش ابدا
باذن الله بكرة هتحسى ان وسع الدنيا دا جنة و وسعت عشان تفرحك و بس
لا تقلقى ...
فى الثانويه كان عالمنا ضيق واهدافنا بسيط
عالمنا بين الدروس والمرسه والمذاكره وهدفنا مجموع كبير ندخل بيه طب وهندسه
للاسف كل ما العالم من حوالينا بيوسع واهدافنا بتكبر كل ما احباطنا واكتئابنا بيزيد
إرسال تعليق