بحس كتير ان الدنيا دي مش دنيتي

جيت فيها غلط

مش عارفة ارتاح فيها ولا عارفة اتأقلم فيها

الناس مش هي الناس

الحياة مش زي الي انا متخيلاها

مش عارفة امتى آخد عليها عشان اقدر اكمل

ولا استنى قدر ربنا واستعجله؟

الناس اتغيرت قوي ماعادتش زي زمان

بقت خبيثة

عديمة المسئولية

أنانية

اختفت الاخلاق خلاص

والموازين انقلبت

الوحش بقى الحلو الي يكسب.. الي حيعرف يعيش ملك

والحلو بقى يتقال له عبيط.. ويتداس عليه بالرجلين زي الصرصار !

الشباب بقى محبط..

بقينا نلاقي شباب زي الورد.. 21 سنة و 22 سنة ومحبط

يانهار اسود !

لما دول حاسين بالاحباط.. امال سابوا اية للي عندهم 70 سنة !

والي متفائل وعاوز يعمل حاجة .. يتهدد.. في حياته.. في مستقبله

يوم مايبقى روش ومهيس وهايف.. يتقالله اعمل حاجة مفيدة تفيد بيها نفسك

ويوم مايفكر يفيد ويستفيد.. ويتهدد والناس تتفرج على بهدلته

يقولوله امشي جنب الحيط.. خليك في حالك

لا سابوه هايف ومرتاح.. ولا خلوه جاد ونفسه يعمل حاجة !

في الحالتين تعب واتدمر



رحمااااااااااااااااااااااااك يارب !

مدونتي

تعبت الصراحة عشان اعمل المدونة دي

لغاية ما اتعملت

كل كلمة حتتكتب هنا هي جزء لا يتجزأ مني .. كل حرف حيعبر عن الذات الشخصية ليا

كان نفسي من زمان في حاجة زي كدة عشان اكتب فيها الي جوايا

والحمد لله لقيتها !